അങ്കമാലി നിയോജകമണ്ഡലത്തിലെ പടിഞ്ഞാറേ അറ്റത്തുള്ള പഞ്ചായത്തിലെ എളവൂർ പുത്തൻകാവ് ക്ഷേത്രത്തിൽ വര്ഷങ്ങളായി നടന്നുവന്നിരുന്ന ഒരു ആചാരമാണ് തൂക്കം. കേരളത്തിലെ പല ക്ഷേത്രങ്ങളിലും തൂക്കം നടത്തിയിരുന്നു. ക്രെയിനിൻ്റെ ആകൃതിയിൽ ഉള്ള തൂക്ക ചാടിൽ തൂങ്ങുന്ന ആളുടെ അരയിൽ കച്ചകെട്ടി, ആ കച്ചയിൽ ചാടിന്റെ കൊളുത്തുകൾ കോർത്ത് ആളെ ഉയർത്തി ക്ഷേത്രത്തിനു വലംവെക്കുന്നു. പക്ഷെ പുത്തൻകാവിൽ മാത്രം തൂക്കം നടത്തുന്ന ആൾ നാല്പത്തൊന്നു ദിവസം വൃതമെടുത്ത്, പുറത്തു എണ്ണയിട്ട് ചവിട്ടി തിരുമ്മി, പുറത്തെ തൊലി പതംവരുത്തി ആ തൊലിയിൽ ചാടിൻറെ രണ്ടു കുളത്തുകൾ കോർത്ത് വിഷുകഴിഞ്ഞു പത്താമുദയത്തിനു നൂറുകണക്കിന് ആളുകളുടെ ശരണംവിളിയോടെ നിരവധി പേർ ചേർന്നു തൂക്കചാടുയർത്തി അമ്പലത്തിനു ചുറ്റും മൂന്നുവട്ടം വലംവെച്ചു ചാട് നിലത്തിറക്കുന്നു. കർമ്മങ്ങളോടെ പുറത്തുനിന്നു കുളത്തു വേർപെടുത്തി അവിടം മഞ്ഞള്പൊടികൊണ്ടു മൂടുന്നു.
വർഷങ്ങളായി തൂക്കം നടത്തിയിരുന്ന നാരായണൻ നായരുമായി ആ അനുഭവത്തെ പറ്റി ചോദിച്ചറിയാൻ കഴിഞ്ഞിട്ടുണ്ട്. നാട്ടിൽ പല ജോലികളും ചെയ്യുന്ന അദ്ദേഹം വൃതം എടുത്തുതുടങ്ങുമ്പോൾ മുതൽ പുതിയ ഒരു തലത്തിലേക്ക് മാറും എന്നാണ് പറയുന്നത്. നൂറുകണക്കിനാളുക്കാരുടെ ശരണംവിളിയും ദേവി സ്തുതികൾക്കുമിടയിൽ പുറത്തു കൊളുത്തിൽ തൂങ്ങുന്നതോ, ക്ഷേത്രത്തിനു വലംവെക്കുന്നതോ,ചാടിൽനിന്നിറങ്ങുന്നതോ എല്ലാം ഒരു മായാലോകത്തേതുപോലെയാണ് നടക്കുന്നത്. ചാടിൽ നിന്നുംഇറങ്ങി വളരെയധികം സമയം കഴിഞ്ഞായിരിക്കും സാധാരണനിലയിൽ എത്തുക. ഒരുകൊല്ലം പുറത്തെ ഒരു കൊളുത്ത് വേർപെട്ടിട്ടും യാതൊരു കുഴപ്പവും കൂടാതെ ചടങ്ങുകൾ പൂർത്തിയായി.
1987 ൽ സ്വാമി ഭൂമാനന്ദ തീർത്ഥയുടെ നേതൃത്വത്തിൽ ക്ഷേത്രനടയിൽ നടക്കുന്ന ഈ ആചാരത്തിനെതിരെ ശബ്‍ദമുയർത്തി തൂക്കം തടയാനുള്ള ശ്രമം നടന്നു. ഇതു വലിയ വാർത്തയായി. വിദേശികൾ ഉൾപ്പെടെ വൻജനാവലി ആ വർഷത്തെ തൂക്കം കാണാൻ എത്തിയിരുന്നു. പോലീസ് പ്രൊട്ടക്ഷനോടെയാണ് അന്ന് തൂക്കം നടന്നത്. അതിനു ശേഷം ഇന്ന് വരെ തൂക്കം നടന്നട്ടില്ല. ഇപ്പോൾ പത്താമുദയം നാളിൽ തൂക്കത്തിനുപകരം പുഷപാഭിഷേകമാണ് നടത്തപെടുന്നത്. പറവൂർ രാജാവിന്റെ അതീനതയിൽ ആയിരുന്ന ഈ ക്ഷേത്രത്തിൽ പാറക്കടവിൽ താമസിക്കുന്ന രാജകുടുംബത്തിൽ പെട്ടവർ ഇപ്പോഴും തൂക്കവുമായി ബന്ധപെട്ട് ഈ ക്ഷേത്രത്തിൽ സന്ദർശനം നടത്തുകയും, പത്താമുദയത്തിന് ആ കുടുംബത്തിലെ പുരുഷ പ്രജയുടെ അനുജ്ഞ ഇപ്പോഴും വാങ്ങുകയും ചെയുന്നു.
